Zestoa

Txikien erritmoek harrotu dute herria

Zestoako kaleak danbor hotsez bete dira larunbata honetan, eta protagonistak, beste behin, etxeko txikienak izan ziren. Umeen danborradak kolorez, musikaz eta emozioz bete zuen herria, eta herritarrek ilusioz eta harrotasunez jarraitu zuten desfilea ibilbide osoan zehar.

200 haur inguruk hartu zuten parte desfilean, danborrak eta atabalak eskuetan hartuta, entseguetan ikasitako erritmoak konfiantzaz interpretatuz.

Arratsaldeko seietan puntuan ekin zion musika bandak danborradako doinuekin. Ordurako prest ziren parte-hartzaileak atabalak astintzeko. Kale ertzetan berriz, ehunka lagun, eguneko protagonistak beren mobiletan inmortalizatu nahian.

Banderadun soldaduak aurrena, zalduntxoak gero. Gastadoreak atzetik sukaldari txikiekin eta danborrada osatzen duten bi konpainiak , bainuetxeko langileak eta desfilea ixteko, karroza.

Danbolinek diseinatu du aurtengo karroza. Udalak danborradako karroza lehiaketa bidez esleitzea erabaki zuen iaz eta 3.000 euroko laguntza jaso zuen elkarteak karrozaren diseinua erabaki eta egin ahal izateko. Aurtengoan, kazetariak izan dira protagonistak baita ere danborradan. Danbolin aldizkariko erredakzioa ere danborradako parte izan zen atzokoan.

Santakutz jaien haurren danborradako karroza urte askotan boluntario talde baten ahaleginaren fruitu izan zen, urtero euren auzokideak harritzen saiatzen zen taldea. Aurtengoan, Danbolineko kideek harritu dituzte herritarrak eta erredakzioa bera atera dute kalera.

Nahikoa danbor jo ostean eta ibilaldia amaitu eta gero, bai txikitxoak eta gazteek eta baita inguratu ziren gurasoek eta ikusleek festarekin jarraitu ahal izan zuten. Izan ere, Ane eta Amets trikitilarien erromeria izan zen Santakutzei amaiera emateko.