Zumaia

Unai Egaña kadetea, bigarren Muskizko lasterketan

Zumaiako Txirrindulari Elkarteko txirrindulariek podiumetik jaitsi gabe jarraitzen dute. Gipuzkoan lasterketarik ez eta kadeteak Muskizera joan ziren bertako lasterketan parte hartzera. «Erabakia ona izan zen eta baita ondo aprobetxatu txirrindulariek ere, ibilbide gorabeheratsuan lehenengoekin helmugaratu eta lasterketa jokatzeko esprintean Unai Egaña bigarren sailkatu zen eta», azaldu du elkarteko kide den Arritxu Iribarrek. Denboraldi honetan bigarrenez sailkatu da bigarren tokian; «oso ondo dabil zumaiarra, baina erregulartasuna falta zaio». Muskizen sei txirrindulari pelotoiari aurrea hartuta ailegatu ziren eta pelotoian sartu ziren Borja Osa eta Xuban Arakistain.

Asteburu honetan kadeteek ez dute lasterketarik; juniorrek, berriz, Lizarran Espainiako Kopako lasterketa izango dute. Datorren asteburuan, bai kadete eta bai juniorrek, Euskadiko Txapelketa izango dute Getxon, eta juniorrek, horren ondoren, Nazioarteko Gipuzkoa Klasikoa izango dute helburu, Europako punta puntako txirrindulariak tropelkide izango dituztelarik.

Lasterketa horien aurretik Gipuzkoako rankingak kaleratu dira eta junior mailan Beñat Sainz eta Aratz Unanue dira aurrena eta bigarren; kadete mailan, Borja Osa bosgarrena da eta Unai Egaña 27.

Infantil eta alebinek taldekako erlojuaren aurkakoak jokatu dituzte. Beste taldeetako txirrindulariekin ekipo mistoa jokatu eta Mairi Lejarreta txapeldun izan da; alebin mutilak hiru ehunenekok utzi dituzte titulurik gabe eta infantiletan, nesken taldea bigarren sailkatu zen. Asteburu honetan ez dute lasterketarik.