Abian da Anaitasunako mendizaleen 'Gure txokuk ezautzen' ekimena

Urte berriarekin batera proposamen polita dakar Anaitasuna Mendi Bazkunak. Mendizale elkarteak eta herriko gazte talde batek antolatuta 'Gure txokuk ezautzen' egitasmoa ipini baitute abian.

Gure mugetatik kanpoko bazterrak liluratzen gaituzte askotan eta gehienetan bidaia interesgarriak antolatu ohi ditugu, bertan, etxean, dugunaren berri asko jakin gabe. Hori dela eta, «herri ingurua ezagutzeko eta lagun giroan» mendi irteerak egiteko antolatu dute egitasmoa.

Herritar orok parte hartzeko moduko ibilaldiak egingo dituzte. Era berean, mendi irteerak proposatzeko aukera ere izango dute. «Askotan, bakarrik ez joateagatik, etxean geratzeko joera dago. Taldean eta eguna zein ordua jarrita errazago agertzen gara etxetik», adierazi dute ekimenaren sustatzaileek.

Gauzak horrela, jada Urte Zahar Egunean egin zuten lehen irteera. 70 lagun elkartu ziren eta Kakuetara joan ziren goiz «polita» igaroz. Balda plazatik abiatuta, Izarraizko Kakuetara egindako lehen irteera honetan, «bakoitza bere erritmora joan da, eta dultzaina eta trikitixa artean, giro paregabea izan dugu», esan zuten antolatzaileek.

Oraingoz, bost mendi irteera antolatu dituzte eta hileko azken larunbatean egingo dituzte. Urtea amaitzeko Kakuetara egindako irteera da estreinakoa; urtarrilaren 28an izango da hurrena eta Urrategi, Hirukurutzeta eta Karakate lotuko dituzte; otsailaren 25ean, Kukuherri eta Samiño ezagutuko dituzte; martxoaren 25ean, Izarraizko Bira egingo dute, eta maiatzaren 7an, Kakuetako egunean, Aitza, Bidegorria, Aittola eta Kakueta izan dira aukeratuak. Orduan, gainera, trikitilariek girotutako hamarretakoa eskainiko dute hango txabolan.

Balda plazatik abituko dira irteera denak eta 8:30ean zehaztu dute hitzordua.

• Temas
• Azkoitia