Euskal kantagintzaren ondarea biltzen duen gida didaktikoa

Nerabeen artean euskal musika eta kulturaren ondarea ezagutzera emateko helburuarekin, Mikel Markez musikariak eta Pako Aristi idazleak 'Gora Euskal Kantagintza' gida didaktikoa sortu dute, gaztetxoei «testuingurua eta pista batzuk» emateko, azaldu zuten aurkezpenean. Proiektua Kultura Eskola programaren barruan kokatzen da, Aldundiko Kultura departamentuak sustatzen duena, bigarren hezkuntzako ikasleen artean sentsibilitate artistikoa eta musikarekiko zaletasuna sustatzeko.

Gidak ibilbide luzea egiten du euskal musikaren historian zehar. «Euskal musika tresnarik zaharrena, duela 38.000 urteko flauta bat, Isturitzeko haitzuloan aurkitu zuten», azaldu zuen Aristik. Ondorengo datuak XVI. mendekoak dira, Europan garai hartan hain modan zeuden baladak hemen ere kantatu baitziren. Hurrengo mendeetako kopla eta bertsoak ere iritsi zaizkigu, ahoz aho transmititu direnak.

'Maitia nun zira' izan zen euskaraz grabatu zen lehenengo abestia 1.900. urtean, Parisen, baina 1960a arte ez zitzaion hasiera emango euskal kantagintza berriari, Michel Labegueriekin. Ondoren iritsi ziren Ez Dok Amairu mugimendua, folk taldeak 70. hamarkadan, euskal rock erradikala ondoren eta XX. mende amaieran estilo anitzeko taldeak eta trikitiaren booma.

Hamalau kapitulutan antolatuta dago gida, eta azkenekoetan interneten iraultza eta streaming plataformen inpaktua ere azaltzen da. Liburuan zehar hainbat argazki eta abestiren letrak ere badira, baita ikasleen ikaskuntza aktiboa eta gogoetatsua sustatzeko diseinatutako jarduerak eta galdetegiak.