Getaria

Maiatzean ospatuko du Getariko Gazte Asanbladak bere urteurrena

Maiatzaren 17an XVII. urteurrena ospatuko du Getariko Gazte Asanbladak. Larunbat horretarako ekintzaz beteko egun berezia prestatzen ari dira. Eguerdiko 14:00etan ekingo diote egitarauari eta bazkaria egingo dute. Bazkal ostean, bingo musikatua prestatu dute Iturrisen eskutik. Amaitutakoan, GGA Zazta izango da. Azkenik, urteurren eguna biribiltzeko, kontzertuak izango dira 22:30etik aurrera: Obego, Las Moskas Retrompeteras eta sorpresa bat.

Bazkarira joan nahi dutenek tiketak erosi behar dituzte Harritarten edo 688606865 (Itsaso) telefonoan.

Maiatzaren 17ko urteurren festaz gainera, hiru dokumentalen proiekzioa antolatu du Getariko Gazte Asanbladak. Lehenengo ikus-entzunezkoa maiatzaren 4ean izango da, arratsaldeko 18:30ean: 'Infiltrats'. Kataluniako mugimendu sozialetan izandako infiltrazio polizialei buruzko dokumentala da. Agenteek harreman intimoak izan zituzten aktibistekin, eta adituen testigantza eta analisien bidez, praktika horien ondorio etiko, legal eta emozionalak aztertzen ditu.

Bigarren emanaldia, berriz, 'Aske bizi' izango da, maiatzaren 11n 18:30ean: Xabier Madariagak aurkeztutako proiekzioa da, LGTBIQ+ kolektiboko kideen bizipen eta adierazpenak batzen dituena. Azkenik, hilaren 24ean, ordu berean 'Historias de orgullo' proiektatuko dute, Euskadiko LGTBIQ+ kolektiboari buruzko dokumentala: mugimenduaren hasiera, egungo egoera, lortutako eskubideak, helmugak...