Pegasus, Kim eta festak

E a naiz inor. Irakurri dut Pegasus spywarea erabilita zelatatuak izan direnen zerrenda eta ez dut nire izena aurkitu. Gobernuek bakarrik eskuratu omen dezakete edozein gailuren datuak hartu ditzakeen programa. Sakelakoa blokeatuta badago ere, bideo grabagailua eta audioa martxan jartzeko gai omen da. Aitak, Miguel Angel Revillak, ziberdelinkuentzian adituek eta arrastorik utzi nahi ez dutenek jarraitzen dute aurreordainketa-txartelarekin sakelakoa hornitzen, WhatsApp, beste aplikazio edo ukipen-pantailarik gabe. Kantabriako presidenteari hainbat aldiz eskaini omen diote azken teknologiadun sakelakoa, baina ez omen du nahi. Zertarako ba, jakeatu ezin litekeen Nokia 301.1 bat duzunean. Gehiengoaren mugikorrak 'smart' bihurtu zirenetik gure pribatutasuna saldu dugu. Guztion bizitza, Espainiako presidentetik hasi eta hau sinatzen dueneraino, hortik bueltan dabil.

Aspertu ederra hartuko luke espiak nire telefonoarekin. Edo akaso ez. Agian landareak eta barne-dekorazio kontuak ere gogoko ditu, eta Instagramen aukera guztietatik kanpo dauden etxeak ikusten ematen du autobusean lanerako bidea.

Twitterreko joerak ere denbora-galtze entretenigarriak dira. Kim Kardashianek New Yorkeko METeko galan Marilyn Monroek 1962an Amerikako Estatu Batuetako John Fitzgerald Kennedy presidenteari 'Zorionak zuri' abestu zioenean zeraman soineko berdina jantzi du. Diseinua gorputzera itsasten den horietako izanik, Kardashianek hura janzteko egin dituen astakeriak kontatu ditu. Hauxe hiru astetan zazpi kilo galtzeko formula magikoa: barazki eta proteina 'garbiak' jan soilik, lasterka egiteko zintan gutxienez bi saio egunero eta batzuetan, adi, sauna-trajearekin. Garai batean zira jantzita izerdi-patsetan ibiltzen zirenen moduan, erdi deshidratatuta. Gala amaitu eta nahi bezainbat pizza eta donut jateko asmoa zuela kontatu zien bere 307 milioi jarraitzaileei. Benetan osasungarri eta eredugarriak emakume honen gomendioak.

Espiek posta elektronikoa miatuko balidate, semearen ikastetxera egindako kontsulta aurkituko lukete. Gobernu Kontseiluak aste honetan onartu du 2023ko lan-egutegia Euskadirako, baina gurasoek oraindik ez dakigu irailean ikasturte berria noiz hasiko den, aurtengo egutegiak dituen berezitasunak medio. Irailaren 6a, asteartea, jai eguna izango da, Juan Sebastian Elkanoren omenez. Eta irailaren 9an ere, Arantzazuko Amaren eguna, ez da lanik egingo Gipuzkoan, San Inazio eguna igandean delako. Noiz irekiko dituzte ateak ikastetxeek? 7an? Egun hauetan, lan egiten dugun guraso asko udararako seme alaben zaintza antolatzen ari gara. Buruhausteak hiru aste barru hasiko dira. Hezkuntzako profesionalen lan-baldintzei zor zaien errespetu osoz, normaltzat har-tzen da ikastetxe batzuetan ekainean arratsaldez umeek eskolarik ez izatea. Badago, aldiz, gure poltsikotik ordaindutako ludoteka, 16:30ak arte. Eta gero, San Juanetan hasiko dira oporrak. Nola kudeatu hamar jai asteren zaintza? Jaiotza-tasa baxuak areagotzea gure erkidegoak duen erronkarik nagusienetakoa dela entzuten ari gara azken boladan. Beste faktore nagusiagoen artean, udako opor luzeek ez du asko laguntzen.

Baina denen gainetik, WhatsAppen dago mamia. Talde bat sutan dago, Estatu Batuek 50 urte atzera egingo dituztelako abortatzeko eskubidea urratuz. Filtratu den zirriborroa onartzen bada, abortu klandestinora bultzatuko ditu emakume asko, edo Kanadara, garai batean hemendik Londresera joaten zirenak bezala. Badago, bai, sutan egoteko arrazoirik.

Beste talde batean argazki mordoxka, ikuste soilarekin ajea eragiten dutenak. A ze biharamuna pasa den astelehenean. Sekulako jendetza nonahi: Errenteriako Sagardo Egunean, Union Artesanaren danborradan, Lazkaoko San Prudentzioetan edo Zumaiako Santelmoetan. Festa gogoa. Pandemia? Whatsappeko beste talde batean positibo eman duen ezaguna. Animo! Zazpigarren olatuak baino hirugarren mundu gerraren mehatxuak gehiago arduratzen gaituen egun hauetan, Urkullu lehendakariak ere positibo eman du, jakingo duzun moduan, espia jaun/andrea.

• Temas
• Covid-19
• Guerra en Ucrania